Товуқ мучали диққатлилик, тартибсеварлик, аниқлик ва ўз фикрини очиқ ифода этиш каби хусусиятлар билан тавсифланади. Бу мучал вакиллари атрофидаги воқеаларга эътиборли бўлиб, ўз қарашлари ва мақсадларига жиддий муносабатда бўлишлари мумкин.
Товуқ мучали Сув, Олов, Тупроқ, Металл ва Ёғоч унсурлари билан боғланади. Унсурга қараб, Товуқ мучали вакилидаги характер, одатлар, муносабатлар ва ҳаётга ёндашувнинг турли қирралари намоён бўлиши мумкин.
Сиз Сув, Олов, Тупроқ, Металл ёки Ёғоч Товуқ эканингизни аниқланг ва ўз унсурингизга хос хусусиятлар билан танишинг.

Металл Товуқ (1921, 1981, 2041)
Металл Товуқ мучалида туғилганлар меҳнатсевар ва жуда масъулиятли инсонлардир. Улар нима хоҳлаётганини ва бунга қандай етишишни аниқ биладилар. Шунинг учун ҳам мақсад сари интилган пайтларида Металл Товуқлар баъзан ортиқча кескин ва қаттиққўл бўлиб қолишади. Улар молия ва тадбиркорлик масалаларини яхши тушунадилар. Агар улар ўз атрофига ишончли жамоа тўплай олсалар, бизнесда катта ютуқларга эришишлари мумкин. Садоқатли ва бағрикенг бўлганлари сабабли, дўстларига кўп вақт ва куч бағишлайдилар.
Металл Товуқлар учун энг яхши маслаҳат — ҳар қандай ҳолатда ҳам ўз фикрини ҳимоя қилишга уриниш ўрнига, баъзан келишув ва муросага ҳам боришни ўрганишдир.


Сув Товуқ (1933, 1993, 2053)
Сув Товуқ мучалида туғилганлар зукко, билимдон ва баҳс-мунозараларни ёқтирадиган инсонлардир. Улар фикрларини таъсирли ва равон баён эта оладилар, шунинг учун ҳам бошқалар билан осонгина мулоқот ўрната оладилар. Сув Товуқ — қизиқарли суҳбатдош, очиқкўнгил ва бошқа Товуқларга нисбатан бир оз юмшоқ табиатли. Бироқ унда энергия жуда кўп — у туну кун тинмай меҳнат қилишга қодир.
Бу йилларда туғилган одамлар ўзларининг яхши ҳазил ҳисси сабабли атрофдагиларнинг ҳурматига сазовор бўладилар.
Сув Товуқлар баъзан майда-чуйда нарсалар ҳақида ортиқча хавотир олиб, вақти ва бор кучини бекорга сарфлаб қўядилар. Улар баъзида арзимаган сабаблар туфайли руҳан тушкунликка тушишлари ёки беҳуда хавотирланишлари мумкин.

Ёғоч Товуқ (1945, 2005, 2065)
Ёғоч Товуқ мучалида туғилган инсонлар ишончли, ҳалол ва эзгу ниятли бўлишади. Уларнинг орзу-ҳаваслари катта бўлса-да, жамоада ишлашни ёқтирадилар ва ҳамкорликни қадрлайдилар.
Кўпинча бундай инсонлар ҳаётда муваффақиятга эришадилар, аммо баъзан ўз олдиларига амалга ошириб бўлмайдиган мақсадларни қўйиб олишади. Ёғоч Товуқ табиатан самимий, содиқ ва ишончли инсон. У ҳеч қачон дўстларига хиёнат қилмайди, рақиб ёки рақобатчи томонга ўтиб кетишни хаёлига ҳам келтирмайди. Бу мучал вакиллари яқинларига жуда меҳрибон, қизиқишлари кўп, саёҳат қилишни жуда ёқтирадилар.
Ёғоч Товуқлар ҳаётини янада яхшилаш учун ўз олдиларига бажариш, эришиш мумкин бўлган мақсадларни қўйишни ўрганишлари ва кучларини майда бекорчи нарсаларга сарфламасликлари лозим.

Олов Товуқ (1957, 2017, 2077)
Олов Товуқ мучалида туғилганларга аъло даражадаги ташкилотчилик қобилияти, етакчилик сифати ва кучли ирода хосдир. Улар табиатан раҳбар, одамларни ортларидан эргаштира оладиган кучга эгалар. Шу боис, бошқарув ишларини маҳорат билан амалга оширадилар, ҳатто одамларга бу ёқадими-йўқми — бунга эътибор ҳам бермайдилар.
Мустаҳкам характери уларга ҳаётда катта ютуқларга эришиш ва мақсадларига етишга ёрдам беради, бироқ баъзан ортиқча тўғрисўзлик ва кескинлик йўлларида тўсиқ бўлиб қолиши мумкин.
Олов Товуқлар агар бир оз уддабурон бўлишса, бошқаларнинг ҳис-туйғуларига кўпроқ эътибор берсалар, уларнинг энг катта орзулари ҳам анча тез амалга ошган бўлар эди.

Тупроқ Товуқ (1909, 1969, 2029)
Тупроқ Товуқ мучалида туғилганлар меҳнатсеварлик ва мақсадга эришишдаги қатъият билан ажралиб турадилар. Улар ўткир зеҳнли, кенг фикрлайдиган ва ҳар бир вазиятни чуқур таҳлил қила оладиган инсонлар. Уларнинг меҳнаткашлиги ва матонати ҳамкасбларининг ҳурматига сазовор бўлади.
Тупроқ Товуқ одатда қўйган барча мақсадларига амалий ва аниқ қадамлар билан етиб боради. Молия ва бизнесга оид масалаларда ҳам улар етарлича билимли ва ишончли ҳисобланадилар. Муҳаббатда эса Тупроқ Товуқ содиқ, самимий ва керак бўлса қурбонликлар қилишга ҳам тайёр.
Тупроқ Товуқ — аъло даражадаги меҳнаткаш. Бироқ шу билан бирга, дам олишни ҳам унутмаслиги керак.