Donishmandlik bizga hayot so‘qmoqlarida ulug‘ saodatni hozirlab inʼom etuvchi vositadir. Abu Ali ibn Sino.

Matmusaning kartasi - 2

Matmusaning kartasi - 2

Kirib kelar yangi yil, hayit eshik qoqmoqda,
Bizning dono Matmusa kassa tomon boqmoqda.

Ishlar joyi tayindir, maoshidan ko‘ngli to‘q,
Bor boyligi kartada, cho‘ntagida tiyin yo‘q.
Kutib o‘tar kun sayin, ishga kelar maosh deb,
Axir bir kun tugaydi, yotaversa karta yeb.

Dasturxondan ko‘ngli to‘q, savdo qilar kartaga,
Qimmat bo‘lsa achinmas, bayram xam bir martaga.
Aroq, vino, shampan bor, kolbasa-yu, shokolad,
Pista, bodom o‘rnini bosa olar marmelad.
Olma, anor o‘rniga sharbat olsa bo‘ladi,
Non o‘rniga tort qo‘ysa dasturxoni to‘ladi.
Lahm go‘shtdan umid yo‘q, kartaga bor suyagi,
Son bo‘lmasa tosi bor, bel bo‘lmasa, kuragi.
Arafaga osh tarqatsa, qo‘shnilardan ko‘ngli to‘k,
Okorochka solinsa ne? Kim xam derdi bunga yo‘q?
Devziraga xushi yo‘q, qimmat, naqdga beradi,
Oq guruchda osh qilsa, ko‘kragini keradi.
Salatiga turp, karam, bodiring ham ketmaydi,
Bo‘sh cho‘ntakka oshni ko‘p yeganingga yetmaydi.

Faqat bitta muammo, bolalarga ko‘ngli bo‘sh,
Karnavalga yur desa, nima qilar, ayting, xo‘sh?
Keyin yana hayit kun, qayga qochar bechora,
Hayitlikning o‘rniga qand beradi, nachora?
TEFAL olar xotinga, yarab qolar bir borga,
Yana xotin yetaklab chiqmasa bas bozorga.

 
Yana ham tushunadi, Matmusani xotini,
Kiymas to‘nin teskari, minmas jahl otini.
Tushunadi do‘stlari, tushunadi yoronlar,
Choyxonaga bormasa, kular faqat yomonlar.
Qurbonlikka kartada o‘nta qo‘yga yetadi,
Har bir qo‘ydan besh foiz, afsus, tekin ketadi.

O‘ylar yana Matmusa hurmatiga yarasha,
Mehmon kelsa uyiga, yoqmaydiku tarasha.
Elektrdan qarzi yo‘q, gaz pulini to‘lagan,
Gaz transdan, chiroqni o‘chmasiga ulagan.
Chiroq o‘chsa ko‘nadi, yurt boshiga kelgan to‘y,
Sham yoqsa ham bo‘ladi, chidab isiga badbo‘y.
Faqat yelib yugurar, uy isitish kuyida.
Ko‘mirlari tugagan, cho‘p qolmagan uyida.
O‘t purkashning o‘rniga gaz trubalar tortar chang,
Gaz so‘rgichga naqd pul yo‘q, Matmusaning xoli tang.

Nima bo‘lsa bo‘ladi, bayram yilda bir marta,
Qarz oladi qo‘shnidan, garoviga so‘m karta.
Fonar olar sham yoqmay, yoqar endi toshko‘mir,
Bu bayramni qo‘shnisi eslab o‘tar bir umr.
Qo‘shni sho‘rlik bilmaydi, so‘m kartaning foydasin,
Axir u ham bilmaydi pul olishning qoidasin.
Matmusaga nima g‘am, bayram kutar betashvish,
Qo‘shnisiga qoldi gal pul o‘yida bosh qashish.

Ayo do‘stlar, yangi yil, kelar hayit yaqinlab,
Qarz bersangiz kartaga olinglar deb fahmlab,
Yana yozdim Matmusa hangomasin eslatib,
Yana sizni Matmusa ketmasin deb yig‘latib.

27 dekabr, 2007 yil.

Muallif izohi:

Yana bir bor Erkin Vohidov ustozdan, o‘quvchilardan, barchadan Donishqishloqlik Matmusa obrazini olganim uchun uzr so‘rayman. Matmusa obrazi uchun o‘quvchilar meni malomat qilmasinlar, iltimos.

Matmusa bank kartasini olganiga to‘rt yil bo‘ldi. Ammo oradan shuncha vaqt o‘tsa ham, uning muammolari yechilmadi. (Bu davrlarni o‘sha zamon odamlari yaxshi bilishadi.)

Kartada pul bor, lekin bayramga, ro‘zg‘orga, oilaga — hammasiga baribir naqd pul kerak.

Demak, Matmusaning karta bilan bog‘liq sarguzashtlari davom etadi.

"Matmusaning kartasi" - birinchi sarguzashtni ham o‘qib ko‘ring.

Sahifamda zerikib qolmang!

  • O‘lmasoy Nishonova. Meni ishqdan sovutma dunyo...

    1984-yilning 22-avgustida Farg‘ona viloyati Toshloq tumanida tavallud topgan. Tumandagi o‘rta maktabni tamomlab, Marg‘ilon Milliy Xunarmandchilik Litseyiga o‘qishga qabul qilingan. Ijod namunalari «Marg‘ilon gulshani», «Farg‘ona tomonlarda» kabi to‘plamlarga kiritilgan.

  • Abdul Boqiy

    Abdul Boqiy (Kenjaboyev Abdulboqi Urayimjon o‘g‘li) – 1978-yilning 15-aprelida Namangan viloyatining Chortoq shahrida tavallud topgan.
    Adabiy faoliyati mobaynida nafaqat anʼanaviy uslubda, balki Modern, xususan, Neo modern, Metamodern uslublarida nazm va nasrda ijod qiladi.

  • Yoqimli sheʼr

    Yoqimli sheʼr. O‘zim yozdim. O‘zimga.
    Sheʼr yo‘g‘ida bir o‘qishga yaroqli.
    Mazza qildim! Tasanno har so‘zimga!
    O‘qiyapman qayta qayta. Maroqli.

  • Hamkasbimga hazil

    (Hamkasbimga hazil)

    Ul yigitkim bir jahon, bu zamon bir donadur,
    Yo‘q demakim ko‘rkini, har sifat nishonadur.

    Bir Umar farzandi ul, kindik qoni Namangon,
    Makon bo‘ldi Andijon-kim, tahsili Farg‘onadur.

  • Yoshlarga to‘y hazili

    Fido bo‘ldi bir oshiqning hurlik oni to‘yxonada,
    Bir gul yuzli barno kutar bo‘ldi uni ostonada.

    Ahli yori o‘ynab kular oshiq ko‘nglin olmoq bo‘lib,
    Ammo oshiq ko‘ngli to‘yda emas balki durdonada.

  • Matmusaning kartasi - 2

    Kirib kelar yangi yil, hayit eshik qoqmoqda,
    Bizning dono Matmusa kassa tomon boqmoqda.

    Ishlar joyi tayindir, maoshidan ko‘ngli to‘q,
    Bor boyligi kartada, cho‘ntagida tiyin yo‘q.
    Kutib o‘tar kun sayin, ishga kelar maosh deb,
    Axir bir kun tugaydi, yotaversa karta yeb.