Onasin isini olgan go‘dakdek
Entikib yashayman! Chamansan Vatan!
Ey, rayhon islari ufurgan diyor,
Bag‘ringga bos meni! Onamsan Vatan!
Subhidam dimog‘im qitiqlar bir his:
Shirmoynon isiga talpinadi tan,
Vo ajab! Shabnamda somonning tafti:
Bir donni non qilgan nonvoysan Vatan!
Suv xidsiz unsur deb aytgan alloma,
Bir hidlab ko‘rsaydi zilol suvingdan!
Eng xushbo‘y islardan taralgan ifor,
Ey mushki-anbarim, gulobim Vatan!
Muattar, munavvar Onam bag‘ridan
Ortiqroq vatanni toparman qaydan?
Jannatlar isidan keltirgan salom,
Bag‘ringda tug‘ilgan go‘dagim Vatan!
Ko‘ksimni to‘ldirib olaman nafas:
Osmoning joy olar mening ko‘ksimdan,
Eng xushbo‘y atirlar qilsinlar havas:
Tanimga yo‘g‘rilgan islaring Vatan!
45-hafta, 2015 yil.