Sabrim, kosang to‘lmay turib to‘kar edim,
Zumda portlab so‘ng tubingga cho‘kar edim,
Aql bo‘lsang yosh boladek so‘kar edim,
Sabr qilgan sabrim, yana bir oz chida.
Katta bo‘ldim. Sabr deding. Sabr qildim.
Lom lim demay senu menga jabr qildim.
Ko‘nib ko‘nmay na ming qildim na bir qildim,
Sendan o‘tib ketdim Sabrim, sen ham chida.
Sabrsizlik qilsam jilov ursak derlar,
Sabr qilsam turtib-turtib tursak derlar,
O‘z bilgancha qilsam xolin ko‘rsak derlar,
Nima deysan? Sabrim, dema: “Bir oz chida”.
Sensiz yursam peshonamni urishim bor,
Senla tursam men g‘aflatda yurishim bor,
O‘rtada bir muvozanat turishim bor,
Yo‘l ko‘rsatib, Sabrim, keyin o‘zing chida.
Qo‘rqib qoldim tong otishdan, kun botishdan,
Qo‘rqib qoldim jim turishdan, gap sotishdan.
Men qo‘rqaman Sabrim seni yo‘qotishdan,
Tashlab ketma. Sabrim menga bir oz chida.
18-xafta, 2015 yil.