Odamlar. Mehringiz tashlab ketinglar,
Ketsangiz vatanga meros qoldirib.
Shunisi yaxshiroq qolgan elimga,
Ketgandan qasrdek uylar soldirib.
Odamlar. Olinglar o‘zingiz bilan
Kindik qon to‘kilgan yer tuprog‘idan.
Olinglar Onangiz pilta chirog‘in,
Kechsangiz Otangiz yer chorbog‘idan.
Odamlar. Ketsangiz ketinglar mayli,
Bilimni xor qilmang aro yo‘llarda,
Qoldirib ketingiz hunaringizni,
Vatanga tosh tergan qora qo‘llarda.
Odamlar. Ketsangiz chaqiring meni,
Bug‘doyi zo‘r bo‘lsa somonlarimdan.
Qadrimdan voz kechib borayin mayli,
Ajabmas qutilsam yomonlarimdan.
Odamlar. Ketsangiz dilim og‘rimas,
Bir vatan bo‘lmadim o‘zim o‘zimga.
Bir kuni non so‘rab uchrashib qolsak
Mayliga qaramang, siz ham ko‘zimga.
Odamlar. Ketsangiz qaytmangiz ortga,
Vatanga yetadi tiriklar joni.
Shundoq ham ko‘payib ketmoqda asli
Vatanda vatansiz qabrlar soni.
4 fevral, 2009 yil.