Hay hay o‘lan jon o‘lan, kelin bo‘lar yor-yor,
O‘z uyidan o‘zgaga ko‘chib kelar yor-yor.
Baxti qo‘nib boshiga, quvonchdan ko‘z yoshiga,
Otasini yig‘latib uydan ketar yor-yor.
Qo‘shiqdan...
Bugun to‘ying jon qizim, uzatyapman kuyovga,
Seni asrab avaylab, qiz qilyapman birovga.
Qiz uzatmoq otaga berilgan bir sinovga,
Otang uchun bitta farz, palaxmon tosh jon qizim.
Quvonaman baxtingdan, kelar kulib o‘ynagim,
Bir chekkada yashrinib to‘yib to‘yib yig‘lagim.
Bugun to‘ying qizginam, kelmaydi hech o‘ylagim,
Yig‘lasam ham baxtingdan yig‘laymanda jon qizim.
Paranjiga o‘rashib yetaklashar yangalar,
Poyandozlar solishib, sochib gullar, tangalar.
Har qadaming yuragim parcha parcha maydalar,
Chidaymanda, seningdek yig‘lolmayman jon qizim.
Ostonaga yetganda «Keling, keling» deydilar,
«Oydek kelin qizingiz duo qiling» deydilar.
Bilmaydilar yangalar, ich etimni yeydilar.
Ey xudoyim sabr ber: Baxtli bo‘lgin jon qizim.
O‘zing eding, jon qizim, mening yaxshi, yomonim,
Yuragimning parchasi, mehribonim, mezbonim,
Labbay degan, xo‘p degan, mening shirin zabonim,
Ostonadan saloming sog‘inaman jon qizim.
Bo‘ynim quchib yig‘laysan: «Yo‘q, ketmayman Otajon!»
Bo‘ldi qizim, bas qizim, ona qizim, onajon!
Oson tutma jon bolam, menda ham yo‘q qirqta jon!
Yig‘lab ketma, otangni yupatib ket, jon qizim!
Momo qizim, oy qizim, kelin bo‘lgan boy qizim,
Bo‘lsin kuyov muborak, o‘z uyingga bor qizim.
O‘g‘il ko‘rgin, qiz ko‘rgin, umring bo‘lsin to‘y qizim,
Senga bergan tarbiyam, odobingda tur qizim.
Karnay, surnay, nog‘ora chaqiradi to‘yingga.
Bugun farzim jon qizim, kuzatyapman uyingga.
Yuragimning parchasin sochib qo‘ydim yo‘lingga,
Hali bir kun o‘tmasdan sog‘inyapman jon qizim.
Tuying ko‘rib baxtimdan ovunyapman jon qizim.
16-noyabr, 2017-yil.