- Ona qizim, momo qizim, yig‘lamasdan
Qani ayting: “Oq yo‘l dada!” - ayting qizim.
Sizga katta bir qo‘g‘irchoq olib kelay,
Ergashmasdan ostonadan qayting qizim!
Ko‘z yoshingiz artib olay ro‘molchamga,
Isingizni hidlab olay, kuling qizim.
Munchoqqinam, yuragimda tumorimsiz,
Men qaytguncha o‘ynab kulib yuring qizim!
Onajoni, mehriboni, qarab turing,
Sochlarini og‘ritmasdan tarang qizim.
Birgalashib dars qilinglar, o‘ynang o‘yin,
Qarang, qanday kulgulari jarang qizim!
Osmon uzoq, yer qattiqlik qilar endi.
Olislardan topgan ishim kimga kerak?!
Sabr deyman, ammo gapga ko‘nmas sog‘inch,
Qizim bilan uyda qolgan hatto yurak.
Qo‘lim ishga bormas, xayol munchog‘imda:
Nima qildi? Nima kiydi? Nima yedi?
Maktabichi? Muallimi majlisga deb
Chaqirtirsa sodda qizim nima dedi?
Tushlarimda arz qiladi ayiqchasi:
“Menga hatto qaramaydi sizni o‘ylab”.
Uyqu qochar, sog‘inch ezar, charchoq g‘olib,
Uxlataman o‘z-o‘zimga ertak so‘ylab.
Qurib ketsin ro‘zg‘ori ham, tirikchilik,
Qurib ketsin orzu havas, topish-tutish.
Farzandidan uzoq bo‘lsa otalarning
Hayoti ham it yotishu, mirza turish.
Ishim tugab tez qaytaman, bag‘rim to‘lar.
- Otasini mehriboni bo‘lgan qizim!
Keling bitta achom qilay, sog‘inganman,
Jajji qo‘li duolarga to‘lgan qizim!
25-Iyul, 2017 yil.
Sog‘inchli tun.