Salom aka, Muhammad Yusuf,
Bir muxlisdan salomnoma xat.
Sizdan meros har kunga salom,
Menga sizni yod etmoq faqat.
Aka, rostdan sog‘inib ketdim.
Qani bitta yangi sheʼr bo‘lsa,
Ertalabda bir o‘qisamu,
Ko‘ngil yana quvonchga to‘lsa.
Xar kuni ish. Sheʼr yozgim kelar.
Vaqt yetmaydi yo men dangasa.
Bir bir kelib yozib qo‘yaman:
Desa desin kim nima desa.
Sheʼr deganim: maqtaguvchim ko‘p.
Ofarin ko‘p. O‘qiguvchim yo‘q.
Sheʼr yozma deb aytmaysiz endi,
Sizdek boshqa o‘qituvchim yo‘q.
To‘yib ketdim sheʼrlar o‘qishdan,
Baʼzilardan ko‘nglim ozadi.
Onasiga xat yozmaganlar,
Ona haqda sheʼrlar yozadi.
Biz boshqamiz yoki siz boshqa:
Asfalt yo‘lda sakraydi jayron.
Bizda o‘sar faqat qizg‘aldoq,
Qishin yozin gullaydi rayhon.
Tavba? Qanday yozgansiz aka
Ota ona, bola haqida?
Onam o‘tdi, otamsiz, yetim:
Alla yozdim chinor haqida.
Aka, rostdan o‘kinib ketdim.
Sizdan taskin: yo‘qotmoq-topmoq.
Xuddi atab yozgansiz menga:
Sizdan o‘git: topmoq – yo‘qotmoq.
Aka, sizsiz ko‘nglim to‘lmaydi:
Do‘stlarim ko‘p, shoir ular ham.
Ko‘p aqlli, ziyoli, xushli.
Sizdek sodda, g‘alatisi kam.
kulmang aka, dard yiqqanim yo‘q!
Quvonchlarim bir dunyo, ummon!
Sizga Xayyom, menga siz, aka,
Mayni kanda qilmasim yomon.
Nima qolar? Bir siqim tuproq.
Sizdan meros qolgan kitoblar.
Ikki misra sheʼringizdagi,
Ming quvonchu, ming iztiroblar.
Ha. O‘zbekning merosi cheksiz,
Otasi xam, Onasi ham yer,
Shoiri bor, Muhammad Yusuf.
Farzandi bor, sodda Alisher.
Xatim tamom, Aka, hush qoling.
Yozolmadim sodda va nafis.
Imzo qo‘ydim, Ali Al Mehr,
Muxlisingiz, oddiy muhandis.
11.11.2016 y.