Салом ака, Муҳаммад Юсуф,
Бир мухлисдан саломнома хат.
Сиздан мерос ҳар кунга салом,
Менга сизни ёд этмоқ фақат.
Ака, ростдан соғиниб кетдим.
Қани битта янги шеър бўлса,
Эрталабда бир ўқисаму,
Кўнгил яна қувончга тўлса.
Хар куни иш. Шеър ёзгим келар.
Вақт етмайди ё мен дангаса.
Бир бир келиб ёзиб қўяман:
Деса десин ким нима деса.
Шеър деганим: мақтагувчим кўп.
Офарин кўп. Ўқигувчим йўқ.
Шеър ёзма деб айтмайсиз энди,
Сиздек бошқа ўқитувчим йўқ.
Тўйиб кетдим шеърлар ўқишдан,
Баъзилардан кўнглим озади.
Онасига хат ёзмаганлар,
Она ҳақда шеърлар ёзади.
Биз бошқамиз ёки сиз бошқа:
Асфальт йўлда сакрайди жайрон.
Бизда ўсар фақат қизғалдоқ,
Қишин ёзин гуллайди райҳон.
Тавба? Қандай ёзгансиз ака
Ота она, бола ҳақида?
Онам ўтди, отамсиз, етим:
Алла ёздим чинор ҳақида.
Ака, ростдан ўкиниб кетдим.
Сиздан таскин: йўқотмоқ-топмоқ.
Худди атаб ёзгансиз менга:
Сиздан ўгит: топмоқ – йўқотмоқ.
Ака, сизсиз кўнглим тўлмайди:
Дўстларим кўп, шоир улар ҳам.
Кўп ақлли, зиёли, хушли.
Сиздек содда, ғалатиси кам.
Кулманг ака, дард йиққаним йўқ!
Қувончларим бир дунё, уммон!
Сизга Хайём, менга сиз, ака,
Майни канда қилмасим ёмон.
Нима қолар? Бир сиқим тупроқ.
Сиздан мерос қолган китоблар.
Икки мисра шеърингиздаги,
Минг қувончу, минг изтироблар.
Ҳа. Ўзбекнинг мероси чексиз,
Отаси хам, Онаси ҳам ер,
Шоири бор, Муҳаммад Юсуф.
Фарзанди бор, содда Алишер.
Хатим тамом, Ака, ҳуш қолинг.
Ёзолмадим содда ва нафис.
Имзо қўйдим, Али Ал Меҳр,
Мухлисингиз, оддий муҳандис.
11.11.2016 й.