Bolalikning sho‘xliklari o‘tib ketdi,
Muhabbatning to‘qliklari o‘tib ketdi,
Hijronlarning yo‘qliklari o‘tib ketdi,
Kulma jonim! Choliqushi bo‘lolmaysan.
Muhabbat deb sahrolarga boshlab ketding,
Visol deya ko‘zlarimni yoshlab ketding,
Sen xam meni hijronlarga tashlab ketding,
Ketma jonim. Sen Farida bo‘lolmaysan.
Latofating nafosatdan ustunmidi?
Mening qalbim yarim, senda butunmidi?
Ishq olovi yonsa qalbim tutunmidi?
Kuyma jonim, “Gul-va-shakar” bo‘lolmaysan.
Muhabbatsiz yuragingni izlamayman,
«Yonimda qol»- deya seni qistamayman.
Yo‘q! Kamronbek bo‘lishni men istamayman
Kechir jonim, ipak qurti bo‘lolmaysan.
Rashod Nuri yozib o‘tdi hijronlarin,
Alisherlar o‘qib eslar armonlarin.
Faridalar unutmaydi Kamronlarin,
Faqat jonim sen Farida bo‘lolmaysan.
24-avgust, 2004 yil.