Yorning yolg‘iz yori bo‘lib yurgandingiz,
Ishq asiri bo‘lib davron surgandingiz.
Kimdan yaxshi, kimdan yomon o‘rgandingiz?
Yolg‘izini yolg‘iz tashlab ketgan yolg‘iz?!
Tanholikni balki obro‘ bilgandirsiz?
Ne oshiqlar yurak bag‘rin tilgandirsiz?
Endi yolhiz, tanho nag‘ma qilgandirsiz?
Yolg‘izini yolg‘iz tashlab ketgan yolg‘iz?!
Juft edingiz, toq bo‘ldingiz, endi kimsiz?
Qaytgani yo‘l topolmassiz, essiz-essiz.
Dunyolarga jar solgan qiz, endi jimsiz.
Yolg‘izini yolg‘iz tashlab ketgan yolg‘iz.
Siz ko‘narsiz, dil ko‘nmaydi toq qolsangiz,
Kimlar hamroh ko‘ngil olis yo‘l olsangiz?
Qayting yana kechiring deb aytolsangiz,
Yolg‘izini yolg‘iz tashlab ketgan yolg‘iz.
12 Aprel, 2012 yil.