Фасли баҳор ўтиб кетибди,
Ёз ўтибди ташвишлар билан.
Куз мевасин тўкиб кетибди,
Қиш келибди юмушлар билан.
Нима қилдик, нима қилмадик?
Қайга бордик, қайга бормадик...
Не онларни ёдлаб юрибмиз,
Не йилларни эсга олмадик.
Ҳар онимиз билиб ғанимат,
Тирикликдан чора изладик.
Охиратни баҳона қилиб,
Кимни сенлаб, кимни сизладик.
Бугун яна шу аҳволдамиз:
Янги йилга ташвишлар бисёр,
Бир томонда болта ва тўнка,
Бир томонда чорлар дўсту ёр.
Қўйинг энди. Қараманг ортга,
Ўтса ўтиб кетсин эски йил.
Борин кўрдик, кўрармиз яна,
Янги йилда янгича ҳосил.
Ҳар йилнинг ўз хосияти бор,
Буни хар бир кекса билади.
Эски йилда туёқ кўп бўлди,
Янги йилда барслар келади.
Етказганга шукрона айтинг,
Етганлар бор, етмаганлар бор.
Янги йилга олинг тол новда,
Эскилардан бир сиқим ёдгор.
Не ёзишни билмайман асли,
Гўё менга ҳар йил одатий.
Лекин аниқ, ҳар йил энтикиб
Янги йилни кутишим табиий.
Нега? Чунки яна янги йил,
Яна умид, янги орзулар.
Воз кечмайман эскилардан ҳам,
Балки янги йилда ушалар?!
Сизларга хам тилакларим шу:
Янги йилда яхшилик бўлсин,
Ҳар кунингиз бўлиб бир қувонч,
Қалбингизга ҳидоят тўлсин.
Меҳр бўлсин ёпинчигингиз,
Асо бўлсин сизга адолат,
Иймон бўлсин сизга улуғ ризқ,
Танимасин сизни разолат.
Сизга байрам бўлсин муборак.
Яна баҳор, ёз, куз ўтгунча
Барча, барча бўлсин саломат,
Яна янги йилга етгунча!
25-декабрь, 2009 йил.