Дўстим, келинг, қулоқ солинг,
Бир суҳбатга муштоқман,
Бир савобга умид қилдим,
Насиҳатдан йироқман.
Ватан деманг. Асли ватан
Бу дунёдир синовли.
Ҳар қарич ер банда учун
Ватан бўлган сўровли.
Ватан нима? Саждага жой,
Бўй бастга мос бир қабр,
Манглай теккан бир кафт замин,
Иймон, инсоф ва сабр.
Уруғ, миллат, наслу насаб
Бу дунёнинг фитнаси.
Фитна бирла пулсиротдан
Ўтолмайди биттаси.
Мен фалончи, мен писмадон,
Деманг асло, бу ёлғон.
Бир бандаси бошқасидан
Устун бўлмас ҳеч қачон.
Шоху султон, беклар деманг,
Бошқаргувчи сизларни.
Бир қанд асал, қамчи эмас,
Қуръон бошлар бизларни.
Минглаб зўрнинг зўрларидан
Бир Аллоҳнинг қули зўр.
Билинг кимсиз, кимлар соқов,
Кимлар кару, кимлар кўр?!
Савоб қилинг Аллоҳ учун,
Савоб кутманг ҳеч кимдан.
Эҳсон қилинг, эҳсон кутманг,
На дўстдан, на ғанимдан.
Жилов қилинг, итоатда,
Бўлсин сўзу кўзингиз,
Шайтон деманг йўлдан урган,
Гуноҳ қилманг ўзингиз.
Ризқ Аллоҳдан, кутманг уни,
Ризқ деманг еб, кийсангиз,
Фарз амалдир иймонга ризқ,
Аллоҳимни суйсангиз.
Дунё учун куйиб ёнманг,
Бир туғилиб, бир ўлинг:
Султон бўлинг нафсингизга,
Иймон учун қул бўлинг.
Дўст, бугунга етар энди,
Қанча айтсам шунча кам.
Зора энди шунча гапга.
Амал қилсам ўзим ҳам.
Али Ал Меҳр
12.01.2021 ~ 18.04.2026 йил.