Шеър қуйилиб келаверар бегоналарга,
Достон битиб қўймоқ осон жононаларга,
Лекин. Бир сўз топилмас дурдоналарга,
Ёзмаганман бирор сатр опаларимга.
Август, 2007 йил.
![]()
Ҳар кўчага кириб кўрдим, бир коса ош изладим.
Ҳар дилдан хуш кайфиятни, ҳар кўздин ёш изладим.
Ҳарки ишни ёзар бўлдим иймонгами, имконга?!
Ҳар сабабдан бўлиб кўрдим, бошимга тош изладим.
27 Август, 2006 йил.
![]()
Йўл сўрадим. Кўрсатдилар. Кетавердим.
Бир адашдим. Ҳайрон бўлдим. Алдадилар.
Қайтиб келдим. Индамадим. Салом бердим.
Яна бошқа йўл кўрсатиб ҳайдадилар.
Февраль, 2013 йил.
![]()
Сумалак, қайнайсан, аста оҳиста,
Баҳорга интилган майсадан бу ғам.
Бағрингга тош қўшиб шарақлатишар,
Қуймаслар жимгина йиғлашингга ҳам.
Июль, 2012 йил.
![]()
Неки иш бўлса бас, айбим ўзимда.
Мен узр кутмайман шундан ҳеч қачон.
Ҳаммани кечириб ўргандим аммо,
Ўзимни кечириб қўйишим ёмон.
Июль, 2012 йил.
![]()
Не деса десинлар бугун дўстларим,
Бугун мен боламан, ўша ёш бола.
Эртак айтиб беринг полвон амаки,
Ширгуруч қиб беринг шоира хола.
Июнь, 2012 йил.
![]()
Розиман тош отинг, тўкайин борим,
Топтаманг тўкилса яхшими ёмон.
Қаровсиз қолмайин мевасиз бўлсам,
Ҳеч бўлса баргимни қилай соябон.
Апрель, 2012 йил.