Отамнинг хотирасига бағишлайман.
Сен соддасан, сабрли, сокин,
Бир оз ўжар, кўпроқ беозор.
Мустаҳкамсан, бир озгина мўрт,
Бир оз қўпол, майинсан чинор.
Юрагинг кенг, кўкларга ошиқ,
Шох таратсанг дунё сенга тор.
Феъли торлар кесса шохларинг,
Индамасдан кўнасан чинор.
Минг бир ғубор баргингда асир,
Ёмғир, дўлдан менга халоскор,
Жаҳлим чиқар хазонрезгида,
Қаҳратон хам оловсан чинор.
Мен эслайман. Чинорли кўча.
Қизил шафақ. Тўполон бозор.
Шомдан дарак бериб чуғирлар
Минглаб қушга ватансан чинор.
Кимга тахта, кимгадир ўтин,
Кимдир ошпаз, кимдир дурадгор.
Балки аскар, балки бешиксоз,
Шохларингни бергансан чинор.
Бор ибтидо, бордир интихо,
Минг йил ўсиб бир қулашинг бор.
Замин борки, куртак унади:
Томирингдан айрилма чинор.
26.05.2016 йил.
Тошкент.