(Сўнгги TICO автомобилига бағишланади)
Кечагина бир ўрам темир,
Бугун эса тайёр маҳсулот.
Тасодифми ва ёки тақдир?
Сўнгги «TICO» бўлибман! Ҳайҳот!
Ортда қолди забардаст пресс,
Титратгувчи ерни паҳлавон.
Лек ажиб бир нафосат ила,
Нафис шакл берди у ўғлон.
Тун қўйнида юлдузлар каби
Учқун сочиб ҳар ён фусункор,
Дуо айлар мени пайвандлар:
- Темир пирим бўлсин мададкор!
Ҳур қизлардек пок этиб таним,
Ҳар томоним силаб сийпалаб,
Ранг бердилар, бердилар жило,
Келинчакдек мени эркалаб.
Кўз қирини ташласа қуёш,
Нур сочилур яноқларимдан.
Гўё бошин эгиб камалак
Жило олган бўёқларимдан.
Чақалоқдек босар бағрига,
Конвейерлар гўёки бешик.
Мафтун этиб ўз жамолига
Йиғув цехи очади эшик.
Мотор қўйди, ихчам, лек абжир,
Соат каби ишлар бу юрак.
Елгин, - дерлар, -бу замин аро,
Тўхтамасин асло ғилдирак.
Ҳар қадамда абжир усталар.
Бир-бир териб чиқдилар жисмим.
Ёпиштириб қўйдилар ҳатто
«TICO» деган чиройли исмим.
Ўғлонлар бор, кўзлари лочин,
Илғаб олар ҳар бир нуқсонни.
Текширишиб кўриб бирма-бир,
Эҳтиёт қил, - дерлар, - Инсонни.
Чиқиб келдим ёруғ оламга,
Кўз-кўз қилиб чироқларимни.
DAMASлар-у NEXIAларга
Мақтанаман бўёқларимни!
Оқ йўл тилар сўнгги бор завод
Меҳрим жўшар тилакларидан:
«Мададкор бўл инсонга, ҳамроҳ,
Раҳмат айтсин юракларидан»
Майли сўнгги «TICO» бўлсам ҳам,
Элга хизмат қилмай қолмайман
Билиб қўйсин, ўзбегим ўғлин,
Хизмат қилиб сира толмайман.
«TICO» дерлар менинг исмимни!
«Тезкор», «Ихчам» сўзлари мавжуд.
«Кучли» дерлар, ҳамда «Ораста»,
Ҳаммасидан жам бўлган вужуд.
Мен сўнггиман, лекин ортимда
«MATIZ» деган укажоним бор!
«DAMAS» хизмат қилар беминнат,
«NEXIA»га айтинг ифтихор.
Биз ўзбекнинг ўғлонларимиз,
Тойларимиз алплари минган.
Фахр айланг, лойиқмиз бунга
Ўзбегимнинг меҳнати сингган!
Февраль, 2004 йил.